• مقدمة :

كل ما عليه سعر هو سلعة، ويتأثر بقانون العرض والطلب.

بالعراق مشروع الزواج فاشل عند الكثير لأسباب عديدة وحتطرق الآن لأحد أهم هذه الأسباب :

• العيش بالوهم

عند الغرب وصف شائع للنساء ( women have no accountability ) بمعنى أنهن لا يتحملن مسؤولية أفعالهن .. وكمثال واضح بمجتمعنا هن النساء اللواتي يرتضين سعراً لأنفسهن ويرفضن أن يتم وصفهن على أنهن سلع.

• أفكار مغلوطة

البعض ممكن يحاول تخفيف أثر الموضوع بتغيير الإسم فيسمي المهر (هدية)، بينما الواقع يگول الهدية أمر إختياري .. فأذا صارت إجبارية صار إسمها سعر. للي تگول “ ما أقبل إلا بشخص يعيشني مثل أهلي ” شلون تردين شخص بـ 5 - 10 سنين تعب يوصل للوصلوله أهلج بـ 30 - 40 سنة؟ ومننسى العوامل الإقتصادية المختلفة، فالبيوت والقدرة الشرائية بوقت أهلنا نهائياً مو مثل وقتنا. إذا أهلج أجبروج وتشوفين نفسج متستاهلين هالوصف، بس مع ذلك تاخذيـن الفلوس وتصرفيها فبعدج مشمولة. لإن الفعل حصل ونوايا الناس متغير واقعهم، حاولي ترجعيله المبلغ بعد الزواج أو تتفقون على طريقة حتى تنفقوه بيها.

• مساوئ الموضوع

وقوعها تحت حكم السوق، الإستفسار عن مواصفـاتها والسبب خلف السعر العالي وإستحقاقها إله ومقارنتها بما موجود في السوق .. وهالشي يخلي الموضوع كله صفقة تجارية بيها رابح وخسران. فهنا النساء العاديات الواهمات بإمتلاكهن قيمة معينة واضعات سعراً عالي يصبحن خيار سيء مقارنة باللاتي يمتلكن نفس المواصفات وإنما بسعر اقل. من مساوئ هذه السلع هي كونهن ماديات، متبخترات وجل همهن إبهار مجتمع السلع الخاص بهن المتمثل بشكل أساسي بصديقاتهن .. وهاي اكيد مو صفات شريكة حياة تبحث عن بناء عائلة مستقرة ومستقبل مع رجل تخليه أول إهتماماتها.

• الحل

عدم تحديد سعر ثابت لا يقبل النقاش للزواج، لإن بتحديد هالسعر صار هو أهم عامل، وميخلي الأولوية لمواصفات الرجل نفسه، أخلاقه، ذكاءه، صحته، ثقافته، إمكانياته .. الخ.

• الخاتمة

المرأة الصالحة التي تجتمع برجل صالح ويبنون حياتهم سوية، علاقتهم هي بأفضل شكل لإن الاثنين صاروا جزء لا يتجزئ من الآخر، بينما الي ترديه مكمل كلشي وتجيه انتِ على الأكثر محتضيفيله شيء ميكدر يحصله بمكان ثاني بطريقة أسهل، فشلون حتقدرين قيمتج عنده؟ وهالشيء يخلي النظام الأول هو الشكل المثالي للعلاقات.