لإنهن سبب رئيسي بفشل كون هالشارع واجهة العراق الثقافية، وغير هالشارع ماعدنا. لمن صار الإعمار للشارع جان المفروض يتحول إسمه من شارع المتنبي لشارع الدولمة .. زين ليش؟

لمن إندكت رجل على الشارع وكثرت الناس التجي صار أثر كلش سلبي للوهلة الأولى يفكر الشخص بأن هالشي زين، أمير ناس أكثر يعني إنتعاش أكثر وهالشي زين وين المشكلة؟ المشكلة يا حبيبي هو أن هالناس جايين على الونسة بصورة أساسية مو علمود شي ثاني، وهالشي حوله من شارع ثقافي بهوية واضحة إلى شارع ترفيهي الرجلين التمشي بيه مو رجلين قراء ولا مثقفين .. رجلين ناس تريد تتونس وبس. بدال الألحان والعزف العراقي صارت طربكة وسوالف ملاهي، بدال القراء الراغبين بإكتساب المعرفة اجوي ناس ماعدها أي إهتمام بالكتب أساساً ..

لمن الناس كامت تجي بالليل أهل المكتبات صاروا يفتحون بالليل لحد ما إجتهم الصدمة .. محد يشتري! محد مهتم! زين المشكلة وين؟ كقاعدة معروفة بالتجارة كلما يقل الطلب يقل العرض وبالتالي الدور متبيع ولمن متبيع محتكدر تطبع ولمن متكدر تطبع حتقل العناوين الموجودة والإصدارات العراقية ففعلياً دتم أذية العراق ثقافياً وإلي هو أساساً من هالناحية موقعه بالحضيض ..

أحد أفضل دور النشر العراقية الصارله سنين عزل مكتبته سكتاوي وطلع شاكياً من هالناس المتعرف قيمة الكتب ووصف إعمار الشارع بواحدة من أسوأ الأحداث بهالمكان.

المحصلة صارت مكان منزوع الهوية شعيط ومعيط يسرح بيه متكدر تنطي وصف موحد لرواده.

ومن الشغلات الي ميفكر بيها باقي الناس هووية زيادة عدد الناس أهل البنايات يزيدون الإيجارات على أساس زيادة غير موجودة بأرباح الدور وبالتالي واحد ورة الثاني يعزلون .. وية هيجي طلب حيجي عرض يلبيه وبالتالي ميبقى غير تجار الكتب المزورة والماعون بألف.