ليش البنية تنزع الحجاب؟

لازم أول شيء تسأل ليش لبسته من البداية، لمن تطلع أي بنت وتشتهر أو تسافر لخارج دولتها العربية، فهي حتكون بعيدة عن تأثير المجتمع بصورته القوية وتكون تحت تأثير أضعف .. إلي هو الآراء على السوشال ميديا، فإذا كانت لابسته بسبب المجتمع هنا إنتفى السبب.

ليش تلبسه بسبب المجتمع؟ ميحتاج تفتر بالشارع أو تسأل أحد، فقط إقرأ التعليقات على أي منشور لبنت إتخذت هالقرار وحتفهم.

أما إذا لبسته لأسباب دينية، فخروجها من هذا التأثير حيساعدها تتلقى أفكار ثانية وتغربلهن لإن أي شخص ميسمع غير رأي واحد من طفولته فحيكبر بإعتقاد أنه حقيقة مطلقة لا تقبل النقاش أو الجدل. فتلقيح الأفكار هذا حينطي منظور ثاني إلها وتسوي اليناسبها.

ليش اكو ناس يضوجون إذا بنت نزعته؟

يحاولون يقنعون البقية أن السبب هو هو نصحاً وخوفاً عليها، بس هاي مو الحقيقة .. يشوفوه إنتقاص وتضعيف لعقيدتهم وفكرتهم وهالشي ميقبلون بيه والبنية مو مهمة المهم شنو حتخلي البقية يفكرون عن الديسووه هم.

إختيار الملابس بالحد القانوني هو خيار شخصي مالمفروض أحد يتدخل بخيارات أحد ثاني الشخصية شميكون هالشخص مشهور وسهل التعليق على خصوصياته، هاي قاعدة إجتماعية إذا إنتفت نهائياً حنعيش بعالم ثاني نفسهم اليعلقون محيحبون يكونون بيه.

إبحث عن موضوع الحجاب وحتلكة آراء كثيرة تكلك أساسه إجتماعي وليس ديني.

وبكيفك شنو تلبس مو بكيفك تلبس الناس.