الزواج عقد قانوني وإجتماعي وحتى ديني، الك بيه حقوق وعليك واجبات.

وتكدر تشبه هالحالة بشريك عمل يجيك متعرفه يحجي وية أهلك ويخليك توقع عقد متعرف تفاصيله، متعرف عواقبه، ميصير لك مجال تشوف عقد أفضل او عقد يناسبك، لا تنجبر عليه وانت كلشي متعرف عنه غير انك طبيت شريك بمشروع تجهله.

وبعدين يجوز هالمشروع يطلع فاشل بس متكدر تسوي شي غير أن تحاول تبقيه على رجليه وهو ديوكع .. ويجوز ينجح وتصير عندكم فروع جديدة بس المؤسس وأبو الصنعة عمره يخلص قبل لا تتعلم تدير وتسيطر وتخلي الفروع هذه معتمدة على ذاتها.

البنت بهالعمر طفلة، يعني لا مراهقة ولا شابة، يعني حرفياً إذا تفتح وياها موضوع تكللها وين واصلين بالقراءة!

ولمن ممكن يكون الرجل بهالعقد المستفيد فالبنت بهالحالة دتصير جريمة بحقها، مستقبلها ديتم تحديده بدون أي رأي إلها بيه وحتتحمل عواقب هي غير مدركة إلها أساساً.

رجلها حيشيب لمن هي تطب مرحلة شبابها، حتضطر تتحمل امراضه ومشاكله الصحية الي تجي بعمره لمن تكون بعز شبابها، ممكن رجلها يصير غير قادر أن يسعدها ويرضيها وهالشي ممكن يؤدي لمشاكل بالزواج نفسه.

رسالة لكل رجل يرضى بهيج شي ..

مثل هيج زيجة مشاكلها أكبر بهواي من بعض الأوهام الي ممكن تعتقدها فوائد الك, لا تدمر مستقبل شخص ميعرف على شنو ديوقع لإن إمتلاك شريك كلشي ميعرف يكون مردوده على المشروع نفسه.